बैठक छाडेर कांग्रेस नेता पौडेल पुगे पाथीभरा देवीको दर्शन गर्न

काठमाडौं । पार्टी केन्द्रीय कार्यसमितिको बैठक छाडेर कांग्रेस वरिष्ठ नेता रामचन्द्र पौडेल पाथीभरा देवीको दर्शन गर्न गएका छन् । उनी आइतबार बिहान ताप्लेजुङको प्रसिद्ध पाथीभरा देवीको दर्शन गएका हुन् ।

उनी परिवारका सदस्यसहित काठमाडौंबाट विराटनगर हुँदै ताप्लेजुङको पाथीभरा पुगेका हुन् । मंसिर २६ गतेदेखि सुरु पार्टीको बैठक पौडेल पक्षले बहिष्कार गर्दै आएको छ ।

पौडेल र सिटौला पक्षले केन्द्रीय समिति बैठक बहिष्कार गरेपछि सभापति शेरबहादुर देउवा र उपसभापति विमलेन्द्र निधिले शनिबार पौडेललाई उनकै निवासमा भेटेका थिए । तर, पौडेलले महाधिवेशनको कार्यतालिका सार्वजनिक नगरेसम्म बैठक बहिष्कार गर्ने अडान राखेका थिए ।

विश्वमा सबैभन्दा छिटो विकास गर्ने मुलुकको सूचीमा नेपाल – अर्थमन्त्री खतिवडा

भद्रपुर। अर्थमन्त्री युवराज खतिवडाले नेपाल अहिले सबैभन्दा छिटो विकास भइरहेका विश्वका दश मुलुकको सूचीमा पर्ने जनाउँदै आर्थिक समृद्धिका लागि यो सकारात्मक सूचक भएको बताउनुभएको छ । मेची बहुमुखी क्याम्पसको प्रशासनिक भवनको आज उद्घाटन कार्यक्रममा बोल्दै अर्थमन्त्री खतिवडाले दक्षिण एशियामा नेपाल र बङ्गलादेशको आर्थिक वृद्धि दर अरूको भन्दा माथि भएको बताउनुभयो ।

वर्तमान सरकारले मुलुकको आर्थिक क्षेत्रमा लिएका नीतिको सकारात्मक नतिजा विस्तारै देखिने उल्लेख गर्दै उहाँले अघिल्लो सरकारले शुरु गरेका अधुरा विकासका आयोजनालाई समेत पूर्णता दिन बजेट छुट्याइएको जानकारी दिनुभयो । अन्तर्राष्ट्रियस्तरमा बिक्ने र प्रतिस्पर्धा गर्नसक्ने शिक्षाको विकास गर्न सरकारले प्राविधिक, वैज्ञानिक र व्यावसायिक शिक्षामा लगानी गर्ने नीति लिएको बताउँदै अर्थमन्त्री खतिवडाले मेची बहुमुखी क्याम्पसको बन्न लागेका भौतिक संरचना निर्माणमा आर्थिक अभाव हुन नदिने प्रतिबद्धता व्यक्त गर्नुभएको थियो ।

अर्थमन्त्री खतिवडा र पूर्वउपप्रधानमन्त्री कृष्णप्रसाद सिटौलाले आज भद्रपुर–८ मा रहेको क्याम्पस परिसरमा नवनिर्मित प्रशासनिक भवनको उद्घाटन र बन्न लागेको महिला छात्रावासको शिलान्यास गर्नुभएको छ । त्रिभुवन विश्वविद्यालय अनुदान आयोग र नेपाल सरकारको सहयोगमा क्याम्पसका सबै संरचना निर्माण हुने भएका छन् । पूर्वउपप्रधानमन्त्री सिटौलाले मेची बहुमुखी क्याम्पसको विकास र विस्तारमा सबै राजनीतिक दलको सहयोग रहेको बताउँदै”

अघिल्लो सरकारले चन्द्रगढीमा निर्माण थालेको स्व गिरिजाप्रसाद स्मृति भवनमा वर्तमान सरकारले एउटा पनि इँटा नथप्नुको कारणबारे अर्थमन्त्री खतिवडालाई प्रश्न गर्नुभएको थियो । त्रिभुवन विश्वविद्यालयका रजिस्टार डिल्लीराम उप्रेतीले आजै मेची बहुमुखी क्याम्पसको मानविकी भवनको शिलान्यास गर्नुहुँदै आगामी वर्षदेखि क्याम्पसमा सूचना प्रविधि विषयको स्नातक (बीआईटी) कक्षा सञ्चालन गर्न आग्रह गर्नुभएको थियो । रासस

Leave a Reply

Your email address will not be published. Required fields are marked *